les accidents scolaires

صباح الخير يا جماعة
يا ططا .. ربي يهديك تسأل على من هو المسؤول وانت تعرف إلّى كل مؤسسة فيها إدارة بمسؤول أو مسؤولين ياخذوا في منحة المسؤولية باش يتحملوا ينجموا يتحملوا أعباء المسؤولية

قالوا ناس زمان "افرش تلقي ما تتغطى" وقالوا "سعدك يا فاعل الخير" وقالوا "أعمل الخير في أهلك وغير أهلك حتى توجد أهلك" وقالوا " الدنيا هذه يوم إليك ويوم عليك"

نعرفك باش اتقولولي يزّي يا إنسانة من الحكايات الفارغة واحنا رانا في دولة القانون والمؤسسات
انجاوبكم بكل حسرة وألم وانقول هذه هي أكبر مصيبة في بلادنا ... على خاطر بين القانون ومن له مسؤولية تطبيق القانون مسافة قرون ... عاد قلت خليني نذكّر شنوا يقولوا ناس قبل فمّاش ما يفهموا ويطبقوا شويا منو ، كيف هوما ما ينجموا يطبقوا في القانون كان فصول العقوبات إلى باش يطبّقها على غيروا وفصول الترقية إلّى باش يطبّقها على روحو

مشكلتنا كيفاش المسؤول يطبّق القانون ... كيفاش يكون واعي بمفهوم المسؤولية .. ويا سيدي في حالة كيف هذه .. جتا كان المسؤول إداريا ما يعرفش القانون وحقوق التلميذ وواجبات المؤسسة ، كان ممكن يتصرّف بشويا انسانية يا رسول الله ... تهو الواحد إلى عندو شويا انسانية كيف يلقى واحد في الشارع يغطس في دمو يطبّس علسه ويهزو للمستشفي ...
مالا فين روح التظامن إلى انحبو نغرسوها عند الناشئة ؟؟؟ وفي مؤسسة تربوية ؟؟؟ فين القيم إلى المؤسسة التربوية من أهدافها غرسها في الصغيرات؟؟؟ فين المثل في مؤسسة تربوية باش الصغيرات يقتدوا بيه؟؟؟؟

توا قلنا الوالدين هوما السبب في تدهور علاقة التلميذ بالمربي وبالمؤسسة التربوية ... زعما حادثة كيف هذه شنوا الفرق بينها وبين حادثة وقعت في الشارع ؟؟؟ فين الفضاء المدرسي إلى التلميذ يحس بأمان فيه؟؟؟؟ فين دور الرعاية والإحاط في الفضاء المدرسي إلى عندو حرمتو؟؟؟
زعما فضاء كيف هذا فين التلميذ تحدثلو حادثة فيه ويمشي للسبيطار وحدو .. يفرق بينو وبين حومة ما فيها حتا شخص عندو انسانيّة معناه بالعربي "حومة باندية"

التلميذ هذا حقو تهظم من إدارة المؤسسة ومن والدو .. ولّى يزيد ينرفزي هو أن والدو من أعوان وزارة التربية ، ما دافعش على حق ولدو.. زعما علاش؟؟؟؟؟ يكونش على خاطر هالإهمال يعتبر حاجة عادية بالنسبة للناس إلّى تخدم في إدارات المؤسسات التربويّة؟؟؟؟

معناه لا خير ولا خير .. والتلميذ يحمد ربي ما تعداش على مجلس التأديب مع زميلو .. على خاطرهم قلقوا راحة إدارة المؤسسة بالتهوّر والإندفاع متاعهم

شكرا ططا لاهية في تحظير لامتحان مهني للمرة الثانية ، الإمتحان لول دوبلت فيه والثاني هاني انحظّر وان شاء الله يهديهم ربي وينجحوني هههههه
قالك كان المتكلّم مهبول يكون السامع عاقل
كان إدارة المعهد باش تعمل تقرير وتكتب فيه إلّى التلميذ حدثتلو الحادثة خارج المعهد .. إلّى باش يقري التقرير لازم يتسائل : كيفاش تلميذ تحدثلو حادثة خارج المعهد ويمشي بدموماتو للمعهد ؟؟؟؟ تهوا الصغير ما يصدّق يلقي سبب باش ما يمشيش للمكتب ... زعما التلميذ هذا يعرف حقوقو والقانون إلى يقول كونو الحادث إلى يصيرلو وهو ماشي للمكتب يعتبر حادث مدرسي؟؟؟
أنا نعرف وممكن انكون غالطة إلّى أي صغير كيف يتجرح وإلا يوجعو راسو يمشي يجري لأمو وإلا لوالديه .. زعما مشي يجري للمعهد على خاطرو يعرف إلى المربين وإدارة المعهد أحن عليه من والديه؟؟؟ وإلا حسبها وقال خليني نمشي اندبّر ورقة نمشي بيها للسبيطار وانداوي بلاش؟؟؟؟
زعما يجي هاك النهار إلّى التونسي يولّى يتصرّف راشد وينحي عقلية استبلاه الآخر؟؟؟ زعما يجي النهار إلّى الإنسان يكون فيه انسان موش مجرّد رقم؟؟ زعما يجي نهار في السنة الدولية للشباب يكونوا المسؤولين على المؤسسات التربوية يفهموا مغزي التظاهرة هذه باعتبار أن أهم ميدان نخدموا بيه الشباب هو التعليم .. وبالتلي أهم دور هو للمؤسسة التربوية؟؟؟؟
والله مانيش عارفة شنوا انقول غير يا ولادي أعملوا تكوين إجتماعي ونفسي للمربين بما فيهم جماعة الإدارة فمّاش ما يفهموا شنوا دورهم

قالك الشاكي عضومي والقاضي عضومي لشكون نشكي يا شومي
المشكلة في الإدارات التونسية وبكل أسف أن المسؤولين عاملين فيها "أنصر أخاك ظالما أو مظلوما" وقت الحدث يكون فيه طرف ثاني وهو التلميذ أو المواطن العادي بصفة عامة .. وتلقاهم يلوجوا ويبحثوا وما يرقدوش الليل باش يطلعوا الزميل صحيح في تصرفاتو وقراراتو .. ويوصلوا باش يجيب شهود من أصحاب النفوس المريضة باش يدعموا بيها الدفاع عن أنفسهم .. والشيء هذا هو إلى الناس الكل تعرفوا وتتألملو ..هو سبب عدم الثقة بين المسؤول والمواطن .. هو سبب عدم الثقة بين التلميذ والمربي.. وبالتالي سبب تدهور العلاقات بين التلميذ والمربي والإدارة .. وهو سبب العلاقة المتشنجة .. وتطييح القدر .. بالطبيعة ماتنجّمش تطلب الناس باش تجترمك لو كان ماكنتش محترم في تصرفاتك وعادل في قراراتك وتحترم الآخر إلى انت مسؤول عليه

ل""لكن بثرثرتكم هذه تهربون من صلب الموضوع ( أطالب بتقديم عريضة إلى وكيل الجمهورية بإدارة المعهد تأييدا لموقف الجدّ) كفانا لتحاليل عقيمة لا تجدي نفعا مع واقع يتدهور إلى الهاوية والتعليل بالرحمة والشفقة والقضاء والقدر والحمد لله لطف ربي""

]أمنيتي نهار نجيب الصيد من وذنو لكني مازيلت ما لقيتش الصيد .. أما عن التحاليل العقيمة رانا يا أدو في المنتدى هذا قاعدين نعطيوا في الخبر ومعاه وجهات نظر وآراء .. لانا نقابة ولانا أصحاب القضية بصفة مباشرة .. آراءنا تدخل في إطار التنديد والتشهير بالتسيّب واللامسؤولية متاع بعض المسؤولين بكل أسف
وانقلّك الحقيقة باش مانكونش متواضعة برشا هي أن مجرّد ابداء الرأي وكتابته والمساهمة في النقاش هو جيبان الصيد من وذنو .. والدليل أن مافماش برشا ناس عندهم الكفاءة والجرأة باش يقولوا رايهم وموقفهم في المنتدى كيف الوخيان ومنهم انت ،
في المنتدى موش مهم مخالفني وإلا موافقدني ، لأن النقاش معناه وجود آراء مختلفة ماكانش يولي الكلام كيف هاكلي يغني وجناحو يرد عليه
وحكاية العريضة بكل صراحة صعيبة عليا كيف ما قلتلك وباش نختم راني نحمّل المسؤولية للأستاذ متاع الرياضة مع الإدارة لأن الأمور بالنسبة ليا هي قانونية وإنسانية .. الأستاذ هو من يجب أن يقوم برعاية حق التلميذ في وقت يكون تحت مسؤوليت

مرحبا بكم جميعا لقد تابعت هذه الحادثة و ساتناول الموضوع بصفتي مربي أنتمي لهيكل وطني غايته النربية و التكوين.
لقد ورد في القانون التوجيهي لسنة 2002 أن المتعلم هو محور المنظومة التربوية.وهذا يعني أن كل المتدخلين في المنظومة التربوية غايتهم تكوين و نربية و تعليم هذا المتعلم.و لكن الاحداث تتوالى و تتشابه و لم نسمع يوما عن اجراء ردعي لمن يتسبب قي خلل للمنظومة التربوية .في العام الماضي سقط متهلم اثناء حصة التربية البدنية في مدرسة اعدادية نتج عنه كسر مظاعف في بده .تحمل زملاءه المسؤولية و حملوه للمستشفى و لم يسأل عنه احد .اليوم يتعرض الطفل لحادث و يقع اهماله لأنه واحد من الشعب و ليس ابن احد المعروفين و المقربين . لأن والده لم يوصي السيد المدير أو أحد مساعديه .هنا أطرح كعادتي الأسئلة :
- لماذا يدقع التلاميذ التأمين
- من المسؤول عن التلاميذ في المسافة الفاصلة بين الاعدادية و ميدان الرياضة.
- هل يعتبر مجرما من اهمل اسعاف تلميذ
.لأنه حتى في صورة تعرضه لحادث بعيدا عن وقت الدراسة من واجبنا اسعافه و من العار ان لا يقع اسعاف طفل .