Nouvelle Rubrique Environnement

boudidah tijani a écrit:: ليتهم اخترعوا خليطا يمتص الافكار الرجعية و الهدامة و المظاهر السلبية التى تعشش فى عقول بعض القراوة

حاشاهم القراوة اللي في معظمهم ناس زواولة و طيبين عندهم تاريخ كبيرو و مستكفين بأرواحهم أما يا خويا التيجاني هاك الكعبتين و كعبة اللي شادين رواشك الانتخابات الجهوية وحاطين فيها الفلوس و الهدايا و المسالن أعطيه برك يقعد في المنصة بحذا والي و إلا وزير و راكبين علينا توا سنوات و سادين البيبان أمام الكفاءات و الشباب و خايفين من الناس الكل، صغيرْ و كبيرْ و اللي يدبي عالحصيرْ؟؟؟

وهاي جايتنا علي الأبواب ميسرة انتخابات الشعب و الجامعات و تاو تشوف كي العادة ما يطلع كان آخر كعبة في الفيترينة، ثـُومـَة تـْعوّضْ بـَصـْلة، و تاوْ تشوف كيف عساس مدرسة يطيح طبيب و الا مهندسْ. يا سيدي هاذوكا بعد ما تـْوَفـّي راعيهم السياسي (هـ.ع) قـعـْدو مـُدّة يـْلوّجو علي زعيم عندو علاقات ما لقاوشْ، وَلاّوْ عملو 'لوبي' قوي يجمع أربع قطاعات حساسة في البلاد (لا فائدة في ذكرهم) حتي ما يسلطوش علينا العصا؛ العباد الكل تعرفهم مقرهم باش الناس تشوفهم و تهابهم حانوت في باب الجلادين يقعدو فيه كل عشية عاملين سلطة موازية للإدارة حتى أنه في المدة الأخيرة اثر إعفاء الكاتب العام للجنة تنسيق التجمع مـْشاوْ لـْمـُعتمد في أقصى شمال البلاد لانتدابه ووضعه تحت سيطرتهم واعدينو ببلاصة في مجلس النواب و حلـّفـُوهْ علي القرآن. و فما إطار آخر كفء بولاية سوسة كان هو باش يجي للجنة التنسيق كتبو فيه طـْرانت جوابات تسيء لسمعته وفي آخر لحظة جاء كاتب عام نظيف و ما عندو ولاء كان لرئيس الدولة ربي يبقيه و يخليه.

هاذوكا يا سيدي بالمرصاد لكل الكفاءات حتـّى التجمعية منها، وهات عاد اشكون اللي كسـّرولو جمعيتو، و اشكون اللي عدّاوُوه علي لجنة النظام، و اشكون اللي كتبو فيه كي العادة طرانت جوابات، و أنا بيدي اللي ما عنديش حتي طموح سياسي و مشني محاككهم في حتي بلاصة رغم اللي والدي وسام الإستقلال ما سـْلـِمتشْ منهم و نبرو عليا مع مسؤول كبير في الجهة بمجرد أنه يراوني نتحدث معاه عرضا خلي عاد كان مشيتلو نولي بالحق خايف علي روحي يوليو يقولو آش عندو معاه و يكثر الضرب؛ و حتي كيف يستدعاني وليت نتحرج و ما نحبش نمشيلو ولكن أنا قلبي كبير و قاعد نخدم في بلادي بصمت و ما نسمعهمشي.

ونزيد نقلك فمـّا اشكون وقت اللي يتسمي مسؤول في الجهة يبعث جماعته لمنطقته و يقلهم شوفولي ثلاثة حاجات : يشرب، وَإلاّ يزني، وإلاّ يحب الفلوس، و زيد يهديولو علي البلاصة فـَليجة كرافاتات و قاجوات غلة باش يجرّبوه و يقولولو مواطنين و أهالي القيروان فرحانين بيك وبكلنا كيف ما تعرفو مشنا معصومين من نقيصة و لازم تلقي واحد يـُحصل. و فـَمـّا اشكون طاح بالحق للدّنكْ فيما مضى و نعرفوهم و يبقاو يدوّرو فيه خوصة في صبعهم؟؟؟

هاذوما يا سيدي اللي عينيهم علي الطاير والناقز و حتي المسؤلين الإداريين ميشي سالمة منهم متسللين عبر قنواتهم لمكاتبهم حتي يتعرفو علي مواعيدهم و برامجهم اليومية و حـْليلو اللي يتردد أكثر من اللاّزم و بدون موجب و يـْحسـّو فيه خـْطر علي مواقعهم، راهو يديهم طويلة يقطـّعولو لحمو بالتنبير و الوشايات بالتداول واحد بعد واحدعند المسؤولين الكبار (اخطاك منه 'مـْضبع' هاذاكا) و في الأماكن العمومية، و يخبشوه بضوافرهم و يلفـّقولو مـْيات ألف مكيدة و مكيدة إيذا لزم باش يبقاو في بلايصهم و يربعو و يخمسو.

هاذوكا يا سيدي اللي تاعبين برشا و معششة في عقولهم الأفكار الرجعية والهدامة و راهو كيف نرجعو للطبيعة و البيئة السـّـْبـُولة اللي معبـّية تلقاها متدنية و اللي فارغة تلقاها ديما واقفة شوكة.

ما تآخذونيش راني ديما نهتري و ما نعرفشي آش نقول وقت اللي بلادي و هويتي و مسقط رأسي تبدا في حالة مزرية ووليت نستعار بها قدام ضيوفي توانسة و أجانب؛ و ربي يهدينا و يرشدنا في خدمة بلادنا اللي ما تفيق كان بـِمـّاليها وبـْشبابها و كفاءاتها موش بتكديس المناصب و الجاه و المال و بأشباهْ كفاءات (...)؟؟؟

هيا توا يزيني راني كثـّرتلها؛ أما راوْ في قلبي برشا حكايات أخري تاو يجي وقت نحكيو فيها؛
السلام عليكم.