"منتدى" مشروع للمحافظة على الطابع المعماري #

السلام عليكم،

بربّي نحبّ نفهم كيفاه عملوا في مراكش و في فاس باش حافظوا على الطابع المعماري متاع المدينة و في نفس الوقت ردّوها وجهة سياحية من أحسن ما فمّا في العالم بالاعتماد على التراث و المعالم التاريخية؟ يا إمّا هوما قويّين برشة و إلا إحنا ضعاف برشة و مخاخنا مسكّرة.

و كيف نقرا الكلام متاع سي مراد الرماح نلاحظ تناقض كبير برشة. توّة من جهة يقول إلي هو خايف على البلاد العربي من الاندثار و من جهة أخرى موش قاعد يعمل في حتى شيء باش يخلق فيها الحركية. يا سي مراد، ربي يعزّك، راهي الحيوط وحدها عمرها ما كانت هي إلي تبعث الحياة في البلاد. راهو أهم حاجة هوما الناس، العباد، البشر...و من بعد تجي الحيوط.

توّة مثلا يا سي مراد كيف يجي مستثمر أجنبي أو تونسي يحبّ يستقرّ في المدينة العربي و إلا يعمل مشروع سياحي و تجيه إنتي و تفرض عليه شروط تعجيزية من قبيل "يلزمك تبني بنوع معين من الطين و إلا الآجر" إلي تلقاه غالي برشة و إلا موش موجود في القيروان، آش تحبّو يعمل المستثمر هذاكا؟ ماو باش يخلّيهالك واسعة و عريضة و يهزّ "شلّاڨاتو" و "ملّاڨاتو" و يمشي يستثمر في مدينة أخرى فيها أقلّ مرج و عطايل (يمشي لمراكش مثلا). و تعرف شنية النتيجة يا سي مراد (هي لا محالة النتيجة واضحة و قاعدين نغزرولها)؟ النتيجة هي أن البلاد العربي ماشية كل عام و تفرغ و سكانها ماشين و يقلّو و ماشية و تولّي بقعة متاع مشاكل (سكر في الليل و عربدة). و النتيجة زادة إلي قاعدين نخسروا في فرص استثمار متاع عشرات المليارات في العام و إلي تنجّم تغيّر وجه القيروان و تردّها من أغنى المدن التونسية و أحسن الوجهات السياحية في العالم (و صدّقوني مانيش قاعد نبالغ...برّاو شوفوا مرّاكش و فاس و أتو تعرفوا قيمة السياحة الثقافية و حجم الفلوس إلي تجي منها). معناها على الدزّة هاذي باش يجينا نهار باش نلقاو البلاد العربي مدينة أشباح و فارغة من السكان

يتبع

السلام عليكم،

و ينجّم واحد من الغيورين على التراث يحتجّ على الكلام هذا و يقوللنا إلي يلزمنا نحافظوا على الطابع المعماري للقيروان مهما كان الثمن خاطر هذاكا رأسمالنا. و عندو ألف حق في الكلام هذا. و لكن فمّا حلول عديدة باش توفّق بين التراث و إحياء البلاد كيما عملوا إخواتنا في المغرب الأقصى. إنّجموا نفرضوا على المستثمرين التقيّد بأنواع معيّنة من المعمار العربي الإسلام و نخلّيولهم الحرية في استعام المواد و الطرق إلي تساعدهم. موش معقول تجي لمستثمر أجنبي يحبّ يعمل مشروع سياحي في البلاد العربي و تفرض عليه باش يبني بالآجر المعمول من الطين. مالا على الدزّة هاذي، تكمّل "صيانة المدينة" تمنع استعمال التيار الكهربائي و تركيب "الكليماتيزور" و استعمال قنوات "الأوناس" و "الصوناد" بحجّة أنّ التجهيزات هاذي ماكانتش موجودة قبل.

و بكل صراحة، وحسب رأيي الشخصي، المسؤولين على جمعية صيانة المدينة هوما من أكبر السؤولين، عن قصد أو غير قصد، عن التراجع الاقتصادي للقيروان بسياسة التحجّر و التقوقع و الانغلاق إلي قاعدين يتّبعوا فيها. و ننصحهم يخمّوما في نهار من النهارات يهزّوا التليفون و يكلّموا زملائهم في مرّاكش أو فاس فمّاش ما يتعلّموا كيفاه يتمّ حماية التراث و توظيفه في نفس الوقت لجلب الاستثمارات.

توّة مثلا علاه جمعية صيانة المدينة، إلي تجيها هبات و إعانات بملايين الدينارات، ما تتبنّاش إحداث و تمويل مهرجان ثقافي عالمي يقع تنظيم التفاعلات متاعو في وسط الساحات متاع البلاع العربي كيما عاملين في مدينة فاس مع الهرجان الدولي للموسيقى الروحية أو في مدينة مراكش مع المهرجان الدولي للجاز و الروك. آما خير و إلا نمشّيو الفلوس الكل في ما لا يعني و في سفرات للمسؤولين ما عندها حتى فائدة على المدينة

ريت كيف قلتلكم راهو أوّل متسبّب في ركود القيروان و تراجعها هوما أولادها؟؟؟